22 Apr 2026 10:35 AM (IST)

NASA चा धक्कादायक अंदाज! सूर्याच्या उष्णतेमुळे पृथ्वीवरील जीवन येणार संपुष्टात?

नास्त्रेदमस आणि बाबा वेंगा यांच्या भविष्यवाणी किती खऱ्या ठरतात हे माहित नसले तरी, नासाच्या सुपरकॉम्प्युटरने एक धक्कादायक पण अविश्वसनीय भविष्यवाणी केली आहे. शास्त्रज्ञांच्या मते, पृथ्वीवरील आपल्याला ज्ञात असलेले जीवनही संपुष्टात येईल. हे युद्ध किंवा प्रदूषणामुळे होणार नाही, तर सूर्याच्या वाढत्या उष्णतेमुळे आणि तीव्रतेमुळे होईल. शाखज्ञ काजुमी ओजाकी आणि क्रिस्टोफर टी. रेनहार्ड यांनी केलेला हा अभ्यास ‘नेचर जिओसायन्स’ या जर्नलमध्ये प्रकाशित झाला आहे. हा निष्कर्ष नासाच्या अ‍ॅस्ट्रोबायोलॉजी इर्नस्टट्यूटच्या डेटावरून काढण्यात आला आहे. चांगली बातमी ही आहे की आपल्याकडे अजून बराच वेळ आहे.

22 Apr 2026 10:25 AM (IST)

भाजपचे ६५ तर तृणमूलचे ३० टक्के उमेदवार गंभीर गुन्हेगार; ADR अहवालातून धक्कादायक

पश्चिम बंगालमधील निवडणुकीच्या तारखा जवळ येत आहेत. राज्यातील मतदानाचा पहिला टप्पा २३ एप्रिलला होणार आहे. दुसरा टप्पा २९ एप्रिल रोजी होणार आहे. निवडणुकीचा निकाल ४ मे रोजी जाहीर होईल. दरम्यान, बंगालमधील या निवडणुकीत उभ्या असलेल्या उमेदवारांवर देशाचे लक्ष केंद्रित झाले आहे. एडीआरच्या अहवालानुसार, दुसऱ्या टप्प्यातील एकूण १,४४५ उमेदवारांपैकी ३३८ (२३%) उमेदवारांनी आपल्यावरील गुन्हेगारी खटले जाहीर केले आहेत.

22 Apr 2026 10:15 AM (IST)

उन्हाचा वाढतोय तडाखा; पाणी टंचाई तीव्र, नाशिकमध्ये 162 गावांना टँकरने पाणी

मार्चच्या सुरूवातीपासूनच उन्हाचा तडाखा वाढल्याने धरणातील पाण्याचे मोठ्या प्रमाणात बाष्पीभवन झाले आहे. मे महिन्यात पारा अजून वाढण्याची शक्यता हवामान खात्याने वर्तविली आहे. त्यामुळे जिल्ह्यात पाणीटंचाईचे संकट उभे ठाकण्याची शक्यता धरणातील जलसाठ्यावरून दिसत आहे.

22 Apr 2026 10:05 AM (IST)

स्पिन करा आणि जिंका बंडल्स! नव्या ईव्हेंटमुळे गेममध्ये वाढणार रंगत

फ्री फायर मॅक्स गेममध्ये मोको स्टोअर ईव्हेंट लाईव्ह झाला आहे. या ईव्हेंटमध्ये प्लेअर्सना वेव्हब्रेकर काझे बंडल आणि फिस्ट बब्ली वेव्ह्स सारखे रिवॉर्ड्स क्लेम करण्याची संधी मिळणार आहे. ईव्हेंटमध्ये मिळणाऱ्या सर्व रिवॉर्ड्सची यादी शेअर करण्यात आली आहे. हा ईव्हेंट पुढील 2 आठवड्यांसाठी गेममध्ये लाईव्ह असणार आहे. ईव्हेंटमध्ये तुम्हाला 2 रिवॉर्ड्स कॅटेगरी मिळणार आहेत. एक ग्रँज प्राईज आणि दुसरे बोनस प्राईज. तुम्हाला या दोन्हीमधील तुमच्या फायद्याचे रिवॉर्ड्स निवडायचे आहेत. यानंतर तुम्ही स्पिन करून रिवॉर्ड्स क्लेम करू शकणार आहेत.

22 Apr 2026 09:55 AM (IST)

अमेरिकेत भारतीयांचा श्वास गुदमरतोय?

वॉशिंग्टन : एकेकाळी भारतीयांसाठी स्वप्नांची दुनिया मानला जाणार अमेरिका (America) आता लोकांना नको झाल्याचे चित्र दिसत आहे. कार्नेगी एंडोमेंट फॉर इंटरनॅशन पीस (२०२६) च्या ताज्या रिपोर्टनुसार, अमेरिकेत स्थायिक भारतीयांना मायदेशी परतण्याची ओढ लागली आहे. तर काही भारतीय अमेरिका सोडून सुरक्षित आणि स्थिर भविष्याच्या शोधात दुसऱ्या देशांचा विचार करत आहेत. अमेरिकेतील सर्वात अल्पसंख्याक समुदाय म्हणून ओळखल्या जाणाऱ्या भारतीयांच्या या निर्णयाने जगभरात खळबळ उडाली आहे.

22 Apr 2026 09:45 AM (IST)

घसरणीसह उघडणार आजचा शेअर बाजार?

अमेरिका-इराण शस्त्रसंधी वाढवल्यानंतर गुंतवणूकदार सावध झाले आहेत. कारण अमेरिका-इराण मधील तणावाचाा परिणाम जागतिक आणि भारतीय शेअर बाजारावर होत आहे. जागतिक बाजारांमधील संमिश्र संकेतांच्या आधारे भारतीय शेअर बाजाराचे प्रमुख निर्देशांक, सेन्सेक्स आणि निफ्टी ५०, बुधवारी घसरणीसह उघडण्याची शक्यता वर्तवण्यात आली आहे. गिफ्ट निफ्टीमधील ट्रेंड्स देखील भारतीय बेंचमार्क निर्देशांकासाठी नकारात्मक सुरुवातीचे संकेत देत आहेत. गिफ्ट निफ्टी, निफ्टी फ्युचर्सच्या मागील क्लोजिंगपेक्षा जवळपास १५४ पॉइंट्सच्या सवलतीवर, २४,४३० च्या पातळीवर व्यवहार करत होता.

22 Apr 2026 09:35 AM (IST)

प्रीतम मुंडे यांचे 'राजकीय पुनर्वसन'; अज्ञातवास संपवून भाजपकडून महत्त्वाची जबाबदारी

बीड: २०२४ च्या लोकसभा निवडणुकीत तिकीट नाकारल्यानंतर दीर्घकाळ राजकीय अज्ञातवासात असलेल्या प्रीतम मुंडे यांचे पुनर्वसन करण्याचे संकेत भारतीय जनता पक्षाने दिले आहेत. पक्षाने आता त्यांना संघटनात्मक पातळीवर मोठी जबाबदारी सोपवून पुन्हा सक्रिय केले आहे. लोकसभेचे तिकीट कापल्यामुळे गेल्या अनेक महिन्यांपासून प्रीतम मुंडे राजकीय आणि सामाजिक कार्यक्रमांपासून दूर होत्या. त्यांच्या या 'अज्ञातवासा'ची राजकीय वर्तुळात मोठी चर्चा होती लोकनेते स्व. गोपीनाथ मुंडे यांच्या निधनानंतर प्रीतम मुंडे यांनी बीड लोकसभा मतदारसंघातून सलग दोन वेळा मोठ्या मताधिक्याने विजय मिळवला होता.

22 Apr 2026 09:30 AM (IST)

पवनराजे निंबाळकर हत्या प्रकरण: २० वर्षांनंतर लागणार निकाल 

मुंबई: राज्याचे माजी गृहमंत्री डॉ. पद्मसिंह पाटील यांच्यावर आरोप असलेल्या बहुचर्चित पवनराजे निंबाळकर हत्याकांडाचा निकाल तब्बल दोन दशकांनंतर लागणार आहे. या खटल्यात स्वतः माजी गृहमंत्री मुख्य आरोपी असल्याने या निकालाकडे संपूर्ण महाराष्ट्राचे लक्ष लागले आहे.

डॉ. पद्मसिंह पाटील आणि त्यांचे चुलत बंधू पवनराजे निंबाळकर यांच्यातील तीव्र राजकीय वैरातून ही हत्या झाल्याचा दावा करण्यात आला आहे. पद्मसिंह पाटील यांनी २५ लाख रुपयांची सुपारी देऊन पवनराजे निंबाळकर यांचा खून घडवून आणल्याचा गंभीर आरोप सीबीआयने (CBI) केला आहे.

22 Apr 2026 09:25 AM (IST)

Nashik News:  कोठडीत असलेल्या भोंदू अशोक खरातची प्रकृती खालावली 

नाशिक: महिलांचे लैंगिक शोषण आणि आर्थिक फसवणुकीच्या आरोपाखाली अटकेत असलेला भोंदू अशोक खरात याची प्रकृती पोलीस कोठडीत असताना अचानक खालावली आहे. मंगळवारी सकाळी त्याला तीव्र मळमळ आणि उलट्यांचा त्रास सुरू झाल्याने पोलीस प्रशासनाची मोठी धावपळ उडाली.विशेष तपास पथकाच्या (SIT) कोठडीत असताना खरातला शारीरिक त्रास सुरू झाला. प्रकृती गंभीर होत असल्याचे पाहून पोलिसांनी तातडीने वैद्यकीय उपचार मिळवण्यासाठी हालचाली केल्या.

22 Apr 2026 09:20 AM (IST)

किरकोळ हाणामारीवरून खासदार युसूफ पठाण यांचे सासरे आणि मेहुण्याला अटक

मुंबई: भारतीय क्रिकेट संघाचे माजी खेळाडू आणि पश्चिम बंगालमधील बहारामपूरचे खासदार युसूफ पठाण यांचे सासरे व मेहुण्याला मुंबई पोलिसांनी अटक केली आहे. भायखळा परिसरात पाणी उडाल्याच्या किरकोळ वादातून एका तरुणाला आणि त्याच्या नातेवाईकांना मारहाण केल्याचा ठपका त्यांच्यावर ठेवण्यात आला आहे.

शनिवारी रात्री ९ च्या सुमारास स्थानिक रहिवासी युसूफ खान यांची गाडी खड्ड्यात आदळल्याने त्यातील पाणी शोएब खान याच्यावर उडाले. युसूफ खान यांनी माफी मागूनही वादाला सुरुवात झाली. शोएब खानने युसूफ खान यांना शिवीगाळ करत बांबूच्या काठीने त्यांच्या गाडीची काच फोडली आणि त्यांना जखमी केले. यानंतर वादाचे रूपांतर हाणामारीत झाले.

22 Apr 2026 09:15 AM (IST)

परतवाडा लैंगिक शोषण प्रकरण: मुख्य आरोपी अयान अहमदसह चौघांना २७ एप्रिलपर्यंत पोलीस कोठडी

परतवाडा (अमरावती): संपूर्ण जिल्ह्याला हादरवून सोडणाऱ्या मुलींच्या लैंगिक शोषण आणि अश्लील व्हिडिओ व्हायरल प्रकरणातील तपासाला आता वेग आला आहे. या प्रकरणातील मुख्य सूत्रधार अयान अहमद तन्वीर अहमद याच्यासह इतर चार आरोपींना न्यायालयाने २७ एप्रिलपर्यंत सात दिवसांची पोलीस कोठडी सुनावली आहे.

पोलीस कोठडीच्या काळात आरोपींच्या आर्थिक व्यवहारांची बारकाईने तपासणी केली जाणार आहे. या गुन्ह्यातून काही आर्थिक लाभ मिळवला गेला आहे का, याचा शोध पोलीस घेत आहेत. लिसांनी यापूर्वीच आरोपींकडील काही संशयास्पद साहित्य आणि इलेक्ट्रॉनिक उपकरणे जप्त केली आहेत. या साहित्याची फॉरेन्सिक आणि तांत्रिक तपासणी केली जाणार आहे.

22 Apr 2026 09:10 AM (IST)

नेपाळमध्ये बालेन शाह सरकारविरुद्ध जनक्षोभ 

काठमांडू: नेपाळमध्ये नुकत्याच झालेल्या सत्तांतरानंतर आता बालेन शाह सरकारला तीव्र जनआंदोलनाचा सामना करावा लागत आहे. सरकारच्या धोरणात्मक निर्णयांविरुद्ध नागरिक आणि विद्यार्थी रस्त्यावर उतरले असून, काठमांडूतील सत्ताकेंद्र असलेल्या सिंह दरबारापर्यंत आंदोलनाचा आवाज पोहोचला आहे. या आंदोलनाचे वैशिष्ट्य म्हणजे हजारो शालेय विद्यार्थी आपल्या गणवेशातच निषेध नोंदवण्यासाठी रस्त्यावर उतरले आहेत. यामुळे आंदोलनाने व्यापक स्वरूप धारण केले आहे. विद्यार्थ्यांच्या मागण्यांवर सकारात्मक संवाद साधण्याऐवजी सरकार दडपशाहीचा अवलंब करत असल्याचा आरोप विद्यार्थी संघटनांनी केला आहे. सरकारने विद्यार्थी संघटनांचे अस्तित्व नाकारल्याने संताप व्यक्त होत आहे.

22 Apr 2026 09:05 AM (IST)

राज्यात  वादळी पावसाचा इशारा; मध्य महाराष्ट्र, मराठवाडा आणि विदर्भाला 'यलो अलर्ट'

पुणे: कडाक्याच्या उन्हाच्या झळा सोसणाऱ्या महाराष्ट्राला येत्या २४ एप्रिलपर्यंत अवकाळी पावसाचा सामना करावा लागण्याची शक्यता आहे. हवामान विभागाने मध्य महाराष्ट्र, मराठवाडा आणि विदर्भातील काही जिल्ह्यांसाठी 'यलो अलर्ट' जारी केला असून, विजांच्या कडकडाटासह वादळी पावसाचा अंदाज वर्तवला आहे.

वाढत्या उकाड्याच्या पार्श्वभूमीवर राज्याच्या विविध भागांत मेघगर्जना आणि जोरदार वाऱ्यासह पावसाची शक्यता आहे. काही ठिकाणी गारपिटीचा अंदाजही वर्तवण्यात आला आहे. एकीकडे पावसाचे संकेत असतानाच, विदर्भात तापमानाचा पारा ४५ अंशांवर पोहोचला आहे. प्रचंड उष्णता आणि आर्द्रतेमुळे नागरिक हैराण झाले आहेत. हवामान बदलाच्या या काळात नागरिकांनी विजा चमकत असताना झाडाखाली किंवा मोकळ्या जागेत थांबणे टाळावे आणि प्रशासनाने दिलेल्या सूचनांचे पालन करावे, असे आवाहन करण्यात आले आहे.