Maharashtra Breaking News Updates Today: जे झालं त्यासाठी माफी मागतो; अभिजीतने लाठीचार्ज झालेल्या विद्यार्थ्यांची माफी मागितली

21 Jul 2026 04:27 PM (IST)

Madhya Pradesh UCC Bill: UCC लागू करणारे मध्य प्रदेश ठरले चौथे राज्य, विधानसभेत विधेयकाला मंजुरी

मध्य प्रदेश विधानसभेत मोठ्या गदारोळात समान नागरी संहिता (UCC) विधेयक मंजूर करण्यात आले. उत्तराखंड, गुजरात आणि आसामनंतर, मध्य प्रदेश हे समान नागरी संहिता लागू करणारे चौथे राज्य ठरेल. या विधेयकात लिव्ह-इन रिलेशनशिप आणि विवाहासंदर्भात अनेक महत्त्वाच्या तरतुदी प्रस्तावित आहेत. एकदा हे विधेयक कायद्यात रूपांतरित झाल्यावर, मध्य प्रदेशात लिव्ह-इन रिलेशनशिपची नोंदणी अनिवार्य होईल. वाचा सविस्तर... 

21 Jul 2026 04:17 PM (IST)

Raj Thackeray: ‘हे सरकार मानसिक रुग्ण, त्यांनाच हॉस्पिटलात भरती करा’; जंतर-मंतरवरील लाठीमारावर राज ठाकरे आक्रमक

दिल्लीतील जंतर-मंतरवर नीट (NEET) पेपरफुटीप्रकरणी आणि केंद्रीय शिक्षणमंत्री धर्मेंद्र प्रधान यांच्या राजीनाम्यासाठी कॉकरोच जनता पार्टीच्या (CJP) नेतृत्वाखाली सुरू असलेल्या आंदोलकांवर झालेल्या लाठीमारावरून राजकीय वातावरण प्रचंड तापले आहे. महाराष्ट्र नवनिर्माण सेनेचे अध्यक्ष राज ठाकरे (Raj Thackeray) यांनी सोशल मीडियाद्वारे पोस्ट शेअर करत केंद्र सरकार आणि पंतप्रधान नरेंद्र मोदी यांच्यावर जोरदार हल्लाबोल केला आहे. “सोनम वांगचुक यांना जबरदस्तीने रुग्णालयात भरती करणे आणि आंदोलकांवर बेफाम लाठीचार्ज करणे, हे पाहून हे सरकारच मानसिक रुग्ण झाले असून त्यांनाच रुग्णालयात भरती करण्याची गरज आहे,” असा संतप्त टोला राज ठाकरेंनी लगावला आहे. वाचा सविस्तर... 

21 Jul 2026 04:09 PM (IST)

‘जास्त तेल ओताल तर सरकार जळून खाक होईल’; जंतर-मंतरवरून संजय राऊतांचा इशारा, CJP आंदोलनाला पुन्हा पाठिंबा

राज्यसभेचे खासदार आणि शिवसेना उद्धव बाळासाहेब ठाकरे पक्षाचे नेते संजय राऊत यांनी दिल्लीतील जंतर-मंतर येथे सुरू असलेल्या CJP (कॉकरोच जनता पार्टी)च्या आंदोलनस्थळी भेट देत आंदोलकांशी संवाद साधला. यावेळी आंदोलनाचे प्रमुख चेहरा बनलेले अभिजित दिपकेही त्यांच्यासोबत उपस्थित होते. आंदोलनाला पाठिंबा दर्शवत राऊत यांनी केंद्र सरकारवर तीव्र टीका केली. वाचा सविस्तर... 

21 Jul 2026 04:00 PM (IST)

भडका उडणार! India- Sri Lanka कसोटी मालिकेत जसप्रीत बुमराह खेळणार की नाही? बीसीसीआय लवकरच…

India Vs Sri Lanka Test Series: इंग्लंड दौरा संपून भारतीय संघ आता झिम्बाब्वेविरुद्ध टी 20 सिरिज खेळणार आहे. दोन्ही संघांमध्ये तीन टी 20 सामने खेळवले जाणार आहेत. त्यानंतर भारतीय कसोटी संघ श्रीलंकेविरुद्ध कसोटी मालिका खेळणार आहे. ही कसोटी मालिका वर्ल्ड टेस्ट चॅम्पियनशिपचा हिस्सा असणार आहे. त्यामुळे ही सिरिज महत्वाची असणार आहे. मात्र या सिरिजमध्ये बुमराह खेळणार की नाही याकडे सर्वांचे लक्ष लागले आहे. बीसीसीआय लवकरच भारतीय संघाची घोषणा करण्याची शक्यता आहे. वाचा सविस्तर

21 Jul 2026 03:55 PM (IST)

CJPचे आंदोलन केवळ नौटंकी; बावनकुळेंनी उडवली खिल्ली

कॉकरोच जनता पार्टीचे आंदोलन हे नौटंकी आहे. सरकारला बदनाम करण्याकरता हे आंदोलन केलं जात आहे. अशा शब्दांत भाजप नेते चंद्रशेखर बावनकुळे यांनी कॉकरोच जनता पार्टीच्या आंदोलनाची खिल्ली उडवली आहे. गेल्या महिनाभरापासून दिल्लीच्या जंतरमंतर मैदानात कॉकरोच जनता पार्टीचे आंदोलन सुरू आहे. केंद्रीय शिक्षण मंत्र्यांच्या राजीनाम्यासाठी सोमवारी सीजेपीने संसद भवनावर मोर्चा आयोजित केला. दुपारच्या सुमारास हा मोर्चा संसदभवनाच्या परिसरात दाखल झाला. त्यावेळी दिल्ली पोलिसांसह सुरक्षा दलाच्या जवानांनी विद्यार्थ्यांवर बेछुट लाठीचार्ज केला. या लाठीचार्जमध्ये शेकडो विद्यार्थी गंभीर जखमी झाले आहेत. वाचा सविस्तर

21 Jul 2026 03:50 PM (IST)

शेतकऱ्यांसमोर दुहेरी संकट; मका-तुरीची विक्रमी पेरणी, मात्र पावसाची दांडी ठरतेय चिंतेचे कारण!

चालू खरीप हंगामात अहिल्यानगर जिल्ह्यामध्ये शेतकऱ्यांनी हवामानाच्या लहरीपणाशी सामना करत पेरण्यांचा वेग कायम ठेवला आहे. कृषी विभागाने दिलेल्या ताज्या अहवालानुसार, जिल्ह्यात आतापर्यंत ७९.३८ टक्के पेरण्या पूर्ण झाल्या आहेत. जिल्ह्याचे खरिपाचे एकूण सरासरी क्षेत्र ७,१६,२०९ हेक्टर असून, त्यापैकी ५,६८,५०० हेक्टर क्षेत्रावर पेरणीची कामे मार्गी लागली आहेत. मात्र, गेल्या काही दिवसांपासून पावसाने दिलेली ओढ आणि उघाडीमुळे पिकांची वाढ काही प्रमाणात खुंटली असून, शेतकरी राजा चिंतेत सापडला आहे. पावसाचा हा खंड असाच लांबल्यास पिकांचे नुकसान होण्याची भीती व्यक्त केली जात आहे. वाचा सविस्तर

21 Jul 2026 03:45 PM (IST)

युनियन बँकेत बंपर भरती! ४७ लाखांपर्यंतचे वार्षिक पॅकेज; ‘या’ तारखेपर्यंत करा अर्ज

Union Bank Recruitment 2026 notification: बँकिंग क्षेत्रात अधिकारी बनण्याची तयारी करणाऱ्या उमेदवारांसाठी युनियन बँक ऑफ इंडियाने (Union Bank of India) नवीन भरती जाहीर केली आहे. युनियन बँक ऑफ इंडियाने ‘भरती प्रकल्प २०२६-२७’ अंतर्गत स्पेशलिस्ट ऑफिसर, जनरल बँकिंग ऑफिसर आणि डोमेन एक्सपर्ट ऑफिसर यांसारख्या विविध एकूण ३९५ पदांसाठी अर्ज मागवले आहेत. ऑनलाईन अर्ज प्रक्रिया २१ जुलैपासून सुरू झाली असून उमेदवार १० ऑगस्टपर्यंत अर्ज करू शकतात. ही भरती कायमस्वरूपी आधारावर केली जाणार असून निवड झालेल्या उमेदवारांची पोस्टिंग बँकेच्या गरजेनुसार देशभरात कुठेही केली जाईल. वाचा सविस्तर

21 Jul 2026 03:40 PM (IST)

अंगणवाडीच्या पोषण आहारात बदल; बालकांच्या ताटात आता शाकाहारी पुलाव

बारामती : महिला व बालविकास विभागाने अंगणवाडीतील घरपोच पोषण आहार योजनेत महत्त्वाचे बदल केले असून, नोव्हेंबर व डिसेंबर २०२६ पासून सुधारित पाककृतींचा पुरवठा केला जाणार आहे. बालके, गरोदर महिला आणि स्तनदा मातांना अधिक पौष्टिक, रुचकर व दर्जेदार आहार मिळावा, यासाठी शाकाहारी (व्हेज) पुलाव, बहुधान्य पौष्टिक पफ यांचा समावेश करण्यात आला असून खिचडीसोबत स्वतंत्र मसाल्याचे पाकीटही देण्यात येणार आहे, अशी माहिती जिल्हा परिषदेचे महिला व बालकल्याण विभागाचे उपमुख्य कार्यकारी अधिकारी आनंद खंडागळे यांनी दिली आहे. वाचा सविस्तर

21 Jul 2026 03:35 PM (IST)

कच्या तेलाची किंमत १०० डॉलर पार जाण्याची शक्यता ; इराण अमेरिका युद्धाचा परिणाम

जागतिक बाजारात कच्च्या तेलाचा साठा आधीच खूप कमी पातळीवर आहे आणि होर्मुझ सामुद्रधुनी बंद असल्यामुळे पुरवठा सतत प्रभावित होत आहे.सीएनबीसीच्या विश्लेषकांनी इशारा दिला आहे .जर जहाजांची नाकेबंदी जास्त काळ चालू राहिली आणि जगभरात तेलाचा साठा कमी राहिला, तर कच्च्या तेलाच्या किंमती लवकरच 100 डॉलर प्रति बॅरलच्या वर जातील. वाचा सविस्तर

21 Jul 2026 03:30 PM (IST)

पुणे महापालिकेनेच भरला नाही मालमत्ता कर; भाड्यापोटी तब्बल 35 कोटी थकित

पुणे : सामान्य पुणेकरांकडून मिळकतकर आणि पाणीपट्टीची दमडी-दमडी वसूल करण्यासाठी जप्तीसारखी कठोर कारवाई करणाऱ्या पुणे महापालिकेला स्वत:च्या मालमत्तांचे भाडे वसूल करण्यात मात्र अपयश आल्याचे समोर आले आहे. महापालिकेच्या मालकीच्या सदनिका, इमारती आणि मोकळ्या जागांच्या भाड्यापोटी तब्बल ३५ कोटी ४४ लाख २८ हजार ६१० रुपये थकित असल्याची धक्कादायक माहिती महापालिकेच्या अधिकृत उत्तरातून उघड झाली आहे. वाचा सविस्तर

21 Jul 2026 03:25 PM (IST)

UAE च्या फुजैराह बंदराजवळ जहाजावर हल्ला

युनायटेड किंगडमच्या 'युनायटेड किंगडम मॅरिटाइम ट्रेड ऑपरेशन्स'ने (UKMTO) दिलेल्या माहितीनुसार, संयुक्त अरब अमिराती(UAE)च्या फुजैराह बंदराजवळ एका जहाजावर हल्ला झाला आहे. UKMTO च्या माहितीनुसार, दिब्बाच्या पूर्वेस १७ नॉटिकल मैल अंतरावर एका अज्ञात शस्त्राने जहाजाला लक्ष्य करण्यात आले. यामुळे जहाजाची स्टिअरिंग यंत्रणा निकामी झाली. अल जझीराच्या वृत्तानुसार, जहाजावरील सर्व कर्मचारी सुरक्षित आहेत.

21 Jul 2026 03:25 PM (IST)

APAAR ID प्रकरणी सर्वोच्च न्यायालयाचा मोठा निर्ण

APAAR ID Supreme Court Verdict: देशभरातील करोडो विद्यार्थी आणि त्यांच्या पालकांशी संबंधित APAAR ID (अपार आयडी) प्रकरणी सर्वोच्च न्यायालयाने अत्यंत महत्त्वाचा निर्णय दिला आहे. न्यायालयाने स्पष्ट केले आहे की, ओडिशा उच्च न्यायालयाचा निर्णय देशभरात लागू करण्याचे निर्देश ते ‘केंद्रीय माध्यमिक शिक्षण मंडळाला’ देतील. या निर्णयामुळे आता APAAR ID साठी पालकांकडून संमती घेण्याच्या अर्जामध्ये बदल होईल. पालकांना आपल्या मुलाचा APAAR ID काढायचा आहे की नाही, हा स्पष्ट पर्याय निवडण्याचे स्वातंत्र्य आता मिळणार आहे. हा मुद्दा केवळ एका स्टुडंट आयडीपुरता मर्यादित नसून शिक्षणाचा अधिकार, वैयक्तिक गोपनीयता, आधार आणि मुलांच्या डिजिटल डेटाच्या सुरक्षेशी जोडलेला आहे. वाचा सविस्तर

21 Jul 2026 03:20 PM (IST)

इराणच्या सात जहाजांना बंदरात प्रवेश रोखला

अमेरिकेच्या 'सेंट्रल कमांड'ने (CENTCOM) दिलेल्या माहितीनुसार, २० जुलैपर्यंत अमेरिकन लष्कराने सात जहाजांना इराणी बंदरांमध्ये प्रवेश करण्यापासून रोखले आहे. एका जहाजाला नष्ट करण्यात आल्याचा दावा केला आहे.

U.S. service members aboard amphibious assault ship USS Boxer (LHD 4) support flight operations day and night from the Arabian Sea as CENTCOM enforces the naval blockade against Iran. As of July 20, the U.S. military has redirected 7 commercial vessels and disabled 1 to prevent… pic.twitter.com/a1gtwipPUf

— U.S. Central Command (@CENTCOM) July 20, 2026

21 Jul 2026 03:15 PM (IST)

केंद्रीय मंत्री जे.पी. नड्डा यांनी जखमी आंदोलकांची घेतली भेट

सोमवारी (२० जुलै) झालेल्या आंदोलनादरम्यान जखमी झालेल्या आंदोलकांची केंद्रीय मंत्री जे.पी. नड्डा यांनी भेट घेतली आहे. त्यांनी दिल्लीतील 'लेडी हार्डिंग मेडिकल कॉलेज'ला भेट दिली. रुग्णालयात दाखल असलेल्या जखमी रुग्णांची प्रकृती आणि आरोग्याविषयी विचारपूस केली. आंदोलनादरम्यान झालेल्या संघर्षामध्ये अनेक जण जखमी झाले होते आणि त्यानंतर त्यांना उपचारासाठी विविध रुग्णालयांत दाखल करण्यात आले होते.

#WATCH दिल्ली: केंद्रीय मंत्री जेपी नड्डा कल हुए विरोध प्रदर्शन में घायल हुए लोगों से मिलने लेडी हार्डिंग मेडिकल कॉलेज पहुंचे। pic.twitter.com/YcwcihYtto

— ANI_HindiNews (@AHindinews) July 21, 2026

21 Jul 2026 03:15 PM (IST)

पुणे महापालिकेची सुरक्षा ऐरणीवर; आंदोलक आतपर्यंत पोहोचल्याने नगरसेवकांकडून सवाल उपस्थित

पुणे :  सोमवारी पुणे महापालिकेची विशेष सर्वसाधारण सभा पार पडली. यावेळी मनसेने केलेल्या आंदोलनामुळे पुन्हा एकदा पुणे महापालिकेच्या सुरक्षा व्यवस्थेचा प्रश्न ऐरणीवर आला आहे. सोमवारी सर्वसाधारण सभेत महापालिकेच्या सुरक्षा व्यवस्थसंदर्भात सत्ताधारी आणि विरोधकांमध्ये जोरदार खडाजंगी झाली. तर आयुक्त नवल किशोर राम यांनी सुरक्षा रक्षकांच्या भरती प्रक्रियेवरच प्रश्नचिन्ह उपस्थित केले आहे. वाचा सविस्तर

21 Jul 2026 03:10 PM (IST)

विद्यार्थ्यांच्या मुद्द्यांवर संसदेत चर्चेची शशी थरूर यांची मागणी

काँग्रेस खासदार शशी थरूर यांनी विद्यार्थ्यांची आंदोलने, उपोषणे, लाठीमार आणि हिंसाचार यांबाबत संसदेत चर्चा करण्याची मागणी केली आहे. महत्त्वाच्या राष्ट्रीय मुद्द्यांवर विचारविनिमय करणे ही संसदेची मूलभूत भूमिका आहे आणि अशा विषयांवर सभागृहात चर्चा झाली नाही, तर मग कोठे होणार, असा प्रश्न त्यांनी उपस्थित केला.

सरकारच्या भूमिकेवर टीका करत, त्यांनी यावर तोडगा काढण्यासाठी खुल्या चर्चेची संधी उपलब्ध करून देण्याचे आवाहन लोकसभा अध्यक्षांना केले. विद्यार्थी हे देशाचे भविष्य आहेत आणि त्यांना अशा प्रकारची वागणूक दिली जाऊ नये, यावर त्यांनी भर दिला. तसेच, थरूर यांनी जबाबदारी निश्चित करण्याची आणि त्वरित कारवाई करण्याची मागणीही केली.

#WATCH दिल्ली: कांग्रेस सांसद शशि थरूर ने कहा, "यह वाकई बहुत दुखद स्थिति है। संसद का काम ही चर्चा करना है। हमारे सामने कई ऐसे मुद्दे हैं जो देश और इस राजधानी शहर में बहुत अहम हैं। हमने देखा कि कल क्या हुआ और ऐसे हालात में अगर संसद इन पर चर्चा करने की जगह नहीं है, तो फिर कौन सी… pic.twitter.com/Rb6x1Gh3jM

— ANI_HindiNews (@AHindinews) July 21, 2026

21 Jul 2026 03:05 PM (IST)

आयफोन 18 प्रो आणि 18 प्रो मॅक्सची किती असणार किंमत?

टेक जायंट कंपनी असलेल्या ॲपलची नेक्स्ट जेनरेशन फ्लॅगशिप आयफोन 18 प्रो सिरीज यावर्षी सप्टेंबर महिन्यात लाँच केली जाणार आहे. कंपनी सप्टेंबर महिन्यात या सिरीजमधील आयफोन 18 प्रो आणि आयफोन 18 प्रो मॅक्स असे दोन मॉडेल्स लाँच करू शकते. पण आगामी आयफोन लाँच होण्यापूर्वीच त्याचे डिटेल्स आणि किंमती समोर आल्या आहेत. कंपनीने अधिकृत घोषणा करण्यापूर्वीच अमेरिकेत आयफोन 18 प्रो आणि आयफोन 18 प्रो मॅक्सची किंमत लीक झाली आहे. यावरून असा अंदाज लावला जात आहे की, आयफोन 17 प्रो आणि आयफोन 17 प्रो मॅक्सच्या किंमतीच्या तुलनेत कंपनीच्या आगामी आयफोन सिरीजच्या किंमती जास्त असणार आहेत. वाचा सविस्तर

21 Jul 2026 03:00 PM (IST)

‘लाठीचार्ज गरजेचा होता’; CJP आंदोलनावर मुख्यमंत्री फडणवीसांची पहिली प्रतिक्रिया, पोलिसी कारवाईला दिले समर्थन

दिल्लीतील जंतर-मंतर येथे सुरू असलेल्या CJP (कॉकरोच जनता पार्टी)च्या आंदोलनावर झालेल्या पोलिस कारवाईबाबत महाराष्ट्राचे मुख्यमंत्री देवेंद्र फडणवीस यांनी महत्त्वाची प्रतिक्रिया दिली आहे. “पोलिसांनी केलेला लाठीचार्ज परिस्थिती नियंत्रणात आणण्यासाठी आवश्यक होता. वेळीच हस्तक्षेप झाला नसता, तर अधिक गंभीर घटना घडल्या असत्या,” असे त्यांनी स्पष्ट केले. वाचा सविस्तर

21 Jul 2026 02:55 PM (IST)

सोनम वांगचुक यांना सफदरजंगमधून मेदांता रुग्णालयात हलवा; दिल्ली उच्च न्यायालयाचे मोठे आदेश

सामाजिक कार्यकर्ते सोनम वांगचुक (Sonam Wangchuk) यांच्या सुरक्षिततेबाबत आणि आरोग्याबाबत मंगळवारी दिल्ली उच्च न्यायालयात सुनावणी झाली. ही सुनावणी सोनम वांगचुक यांच्या पत्नी गीतांजली यांनी दाखल केलेल्या याचिकेवर आधारित होती. सॉलिसिटर जनरल तुषार मेहता यांनी केंद्र सरकारची (Central Goverment) बाजू मांडली. सुनावणीदरम्यान, सॉलिसिटर जनरल तुषार मेहता यांनी सांगितले की, सोनम वांगचुक यांना सफदरजंग रुग्णालयातून मेदांता रुग्णालयात हलवण्यास सरकारचा कोणताही आक्षेप नाही. वाचा सविस्तर

21 Jul 2026 02:50 PM (IST)

अफगाणिस्तानमध्ये नैसर्गिक आपत्तीचा कहर! अचानक आलेल्या पूरात २० जणांचा मृत्यू, शेकडो बेपत्ता

अफगाणिस्तानवर पुन्हा मोठे संकट कोसळले आहे. अचानक आलेल्या पुरामुळे २० जणांचा मृत्यू झाला आहे. तर १०० हून अधिक लोक बेपत्ता असल्याचे सांगितले जात आहे. अफगाणिस्तानच्या राष्ट्रीय आपत्ती व्यवस्थापन विभागाने याची पुष्टी केली. सध्या बेपत्ता लोकांचा शोध सुरु आहे.

21 Jul 2026 02:45 PM (IST)

लढाई अस्तित्वाची! Shreyas Iyer समोर असणार झिम्बाब्वेचे आव्हान; पहिला सामना कधी होणार?

येत्या 23 जुलैपासून भारत विरुद्ध झिम्बाब्वे यांच्यात तीन टी 20 सामन्यांची मालिका सुरू होणार आहे. भारतीय संघाचे नेतृत्व श्रेयस अय्यर करताना दिसणार आहे. भारतीय संघात अनेक बदल दिसणार आहेत. श्रेयस अय्यर समोर कर्णधार म्हणून आपला पहिला सामना जिंकण्याचे आव्हान असणार आहे. 23 जुलै रोजी हा पहिला टी 20 सामना किती वाजता सुरू होणार आणि कुठे पाहू शकणार याबाबत जाणून घेऊयात.

21 Jul 2026 02:30 PM (IST)

‘पंतप्रधानांनी देशातील विद्यार्थ्यांची माफी मागावी’; लाठीमारावरून राहुल गांधींचा थेट हल्ला; RLM रुग्णालयात जखमींची घेणार भेट

लोकसभेतील विरोधी पक्षनेते आणि काँग्रेसचे खासदार राहुल गांधी (Rahul Gandhi) यांनी ‘सीजेपी’चा (CJP) संसदेकडे निघालेला मोर्चा, आंदोलकांवरील पोलिसांचा लाठीचार्ज आणि ‘नीट’ (NEET) पेपरफुटीच्या मुद्द्यावर निवेदन जारी केले आहे. त्यांनी म्हटले की, काल संसद भवनाजवळ घडलेल्या घटनांबद्दल पंतप्रधान मोदी आणि त्यांच्या सरकारने विद्यार्थ्यांची माफी मागितलेली नाही. देशातील तरुण एका भ्रष्ट शिक्षण व्यवस्थेविरुद्ध आंदोलन करत आहेत; शिक्षण व्यवस्था ही वाळवी लागलेल्या लाकडाप्रमाणे आतून पोखरली गेली आहे, याची संपूर्ण देशाला जाणीव आहे. पंतप्रधान मोदी गप्प का आहेत? त्यांनी विद्यार्थ्यांची माफी मागितली पाहिजे. मी जखमी विद्यार्थ्यांना भेटण्यासाठी आरएलएम (RLM) रुग्णालयात जाणार आहे.

21 Jul 2026 02:25 PM (IST)

पहिल्या पतीशी फोनवर बोलत असल्याच्या संशयातून पत्नीची हत्या; ओशिवरा येथील धक्कादायक घटना

मुंबई येथून एक धक्कादायक घटना समोर आली आहे. सतत फोनवर बोलण्याच्या संशयातून आणि कौटुंबिक वादातून एका पतीने आपल्याच पत्नीची हत्या केल्याचे समोर आले आहे. पोलिसांनी मृतदेह ताबयात आरोपी पतीला अटक केली आहे. या घटनेने परिसरात खळबळ उडाली आहे. घडलेली घटना ओशिवऱ्यातील गुलशननगर येथील रोस्वाल्ट बिल्डिंगमध्ये सोमवारी रात्री घडली.

21 Jul 2026 02:10 PM (IST)

MRP पेक्षा जास्त पैसे आकारणाऱ्या दुकानदारांवर कारवाई; नागपुरात 20 दुकानांवर गुन्हे दाखल

शहरातील आणि जिल्ह्यातील बाजारपेठांमध्ये व्यावसायिक आस्थापनांकडून मालावर कमाल किरकोळ किंमतीपेक्षा (एमआरपी) जास्त दर आकारल्याची प्रकरणे सातत्याने समोर येत आहेत. या मनमानी दरवाढीमुळे सामान्य ग्राहकांचे आर्थिक नुकसान होत आहे. अन्न आस्थापनांमध्ये नियमांचे काटेकोर पालन सुनिश्चित करण्यासाठी अन्न आणि औषध प्रशासनाच्या (एफडीए) नियमित कारवाईनंतर, दुकानांमध्ये होणाऱ्या उघड उल्लंघनाच्या वाढत्या तक्रारींनंतर वजन आणि मापन विभागानेही कठोर भूमिका घेत पूर्णपणे सक्रियता दाखवली आहे. याचा परिणाम बाजारपेठेत जाणवू लागला आहे.

21 Jul 2026 02:05 PM (IST)

सोनम वांगचुक यांच्या आंदोलनाला पत्नीची खंबीर साथ! पण नेमक्या कोण आहेत गीतांजली अंगमो?

सामाजिक कार्यकर्ते सोनम वांगचुक सध्या आपल्या आंदोलनामुळे आणि आमरण उपोषणामुळे चर्चेत आहेत. दरम्यान, आता त्यांच्या पत्नी गीतांजली जे. अंगमो देखील नागरिकांच्या चर्चेत आल्या आहेत. सोनम वांगचुक सध्या रुग्णालयात उपचार घेत असताना, त्यांच्या पत्नी केवळ त्यांच्या आंदोलनाचा आवाज बुलंद करत नाहीत, तर कायदेशीर लढ्यापासून ते जनसमर्थन मिळवण्यापर्यंत प्रत्येक आघाडीवर सक्रिय दिसत आहेत. अशा परिस्थितीत, आज आपण जाणून घेणार आहोत की, गीतांजली जे. अंगमो नेमक्या कोण आहेत आणि त्यांचा आतापर्यंतचा प्रवास कसा राहिला आहे.

21 Jul 2026 02:00 PM (IST)

आषाढी एकादशीनिमित्त मुंबईत विशेष सांगीतिक कार्यक्रमाचे आयोजन

सांस्कृतिक कार्य संचालनालयाच्यावतीने आषाढी एकादशीनिमित्त ‘कानडा राजा पंढरीचा’ या विशेष सांगीतिक कार्यक्रमाचे आयोजन करण्यात आले आहे. शनिवार, दि. २५ जुलै २०२६ रोजी सायंकाळी ६.०० वाजता रंगशारदा, वांद्रे (पश्चिम), मुंबई येथे हा कार्यक्रम सादर होणार आहे. कानडा राजा पंढरीचा’ हा महाराष्ट्राच्या समृद्ध भक्तीपरंपरेचा आणि वारकरी संप्रदायाच्या सांस्कृतिक वारशाचा सुरेल आविष्कार आहे. विठ्ठलभक्ती, संतपरंपरा आणि अभंगसंगीत यांच्या माध्यमातून रसिकांना भक्तिरसपूर्ण सांगीतिक अनुभव देण्याचा प्रयत्न या कार्यक्रमातून करण्यात आला आहे.

21 Jul 2026 01:55 PM (IST)

पुणे-सातारा महामार्गावरील हत्येचा उलगडा! वडिलांच्या खुनाचा बदला 23 व्या वर्षी घेतला

पुणे येथून एक हत्येची घटना समोर आली आहे. जुन्या कात्रज बोगद्याजवळ झालेल्या खूनप्रकरणाचा ग्रामीण पोलिसांनी धक्कादायक उलगडा केला आहे. हा खून कोणत्याही वैयक्तिक वादातून नव्हे, तर तब्बल दोन वर्षांपूर्वी झालेल्या वडिलांच्या हत्येचा बदला घेण्यासाठी रचल्याचे तपासात समोर आले आहे. 23 वर्षीय तरुणाने आपल्या तीन साथीदारांच्या मदतीने हा कट रचल्याची कबुली दिली असून, पोलिसांनी चौघांना अटक करत देशी बनावटीचे पिस्तूल आणि जिवंत काडतुसे जप्त केली आहेत.

21 Jul 2026 01:45 PM (IST)

सोनम वांगचुक यांच्या आंदोलनाच्या पार्श्वभूमीवर ‘3 इडियट्स’ची पुन्हा थिएटरमध्ये एन्ट्री

बॉलिवूडचा लोकप्रिय चित्रपट ‘3 इडियट्स’ पुन्हा एकदा प्रेक्षकांच्या भेटीला येणार आहे. आमिर खान, आर. माधवन, शर्मन जोशी, करीना कपूर आणि बोमन इराणी यांच्या दमदार अभिनयाने गाजलेला हा चित्रपट तब्बल १७ वर्षांनंतर पुन्हा सिनेमागृहात प्रदर्शित होणार असल्याची माहिती समोर आली आहे.

21 Jul 2026 01:35 PM (IST)

ट्रम्प यांचा मोठा निर्णय! कॅनडावर फोडला टॅरिफ बॉम्ब; व्यापारयुद्ध पेटणार?

अमेरिकेचे राष्ट्राध्यक्ष डोनाल्ड ट्रम्प यांनी एक खळबळजनक निर्णय घेतला आहे. त्यांनी कॅनडातून आयात होणाऱ्या बहुतांश वस्तूंवर ५०% टॅरिफ लादण्याची घोषणा केली आहे. त्यांच्या या निर्णयामुळे अमेरिका आणि कॅनडातील व्यापार तणाव पुन्हा वाढू शकतो. या निर्णयामुळे जागतिक बाजारपेठेतही खळबळ उडण्याची शक्यता आहे.

21 Jul 2026 01:25 PM (IST)

एका दिवसाला लाखोंची कमाई! 176 कोटी पगार घेणारे सी. विजयकुमार कोण आहेत?

भारतातील आयटी क्षेत्रात अनेक मोठी नावे आहेत, पण सध्या सर्वाधिक चर्चेत असलेले नाव म्हणजे सी. विजयकुमार. त्यांच्या कामगिरीपेक्षा यावेळी त्यांच्या मानधनाची चर्चा अधिक रंगली आहे. एका भारतीय आयटी कंपनीच्या प्रमुखाला तब्बल शेकडो कोटी रुपयांचे वार्षिक पॅकेज मिळाल्याने उद्योगविश्वासह सर्वसामान्यांमध्येही उत्सुकता निर्माण झाली आहे. मात्र, हा प्रवास एका दिवसात घडलेला नाही. अनेक वर्षांची मेहनत, सातत्य आणि योग्य निर्णय यामुळे त्यांनी हे स्थान मिळवले आहे.

21 Jul 2026 01:20 PM (IST)

‘पेपर लीक करणाऱ्यांना अशी शिक्षा द्या…’ दिल्लीतील आंदोलनानंतर पंतप्रधान मोदींची मोठी भूमिका

संसदेच्या पावसाळी अधिवेशनाच्या दुसऱ्या दिवशी एनडीए खासदारांच्या ‘मंगल मिलन’ बैठकीनंतर, केंद्रीय संसदीय कामकाज मंत्री किरेन रिजिजू यांनी सांगितले की, पंतप्रधान मोदींनीही या बैठकीत पेपरफुटीचा मुद्दा उपस्थित केला. यावेळी पंतप्रधान मोदींनी बैठकीदरम्यान हे स्पष्ट केले की, नुकत्याच झालेल्या नीट परीक्षेच्या पेपरफुटीसाठी जबाबदार असलेल्यांना कोणत्याही परिस्थितीत सोडले जाणार नाही आणि त्यांना कठोरतम शिक्षा दिली जाईल. पंतप्रधान मोदींनी असेही सांगितले की, पेपरफुटी रोखणे ही केवळ केंद्र सरकारची जबाबदारी नाही, तर याचा मुकाबला करण्यासाठी सर्व राज्य सरकारांनी आणि राजकीय पक्षांनी एकत्र येऊन काम केले पाहिजे.

21 Jul 2026 01:15 PM (IST)

संसद मोर्चात ११८ पोलीस गंभीर जखमी

सोमवारी राजधानी नवी दिल्लीत कॉकरोच जनता पक्षाच्या संसद मोर्चादरम्यान मोठा गोंधळ उडाला. या हिंसक आंदोलनानंतर पोलिसांनी दंगलखोरांविरुद्ध कठोर कायदेशीर कारवाई सुरू केली आहे. हत्येचा प्रयत्न आणि सार्वजनिक मालमत्तेचे नुकसान या कलमांखाली गुन्हे दाखल करण्यात आले आहेत. पोलिसांनी वेगवेगळ्या घटनांच्या आधारे अनेक एफआयआर दाखल करून आपला तपास तीव्र केला आहे.

21 Jul 2026 01:06 PM (IST)

राम मंदिर दानचोरीप्रकरणी नवीन SIT स्थापन करा; सर्वोच्च न्यायालयाचे महत्त्वपूर्ण आदेश

अयोध्येतील राम मंदिर दानचोरीप्रकरणी सर्वोच्च न्यायालयात सुनावणी झाली. या सुनावणीत कोर्टाने सरकारला नव्याने विशेष तपास पथक (एसआयटी) स्थापन करण्याचे निर्देश दिले आहेत. सरन्यायाधीश सूर्यकांत यांनी सांगितले की, तपासाला योग्य आणि ठोस निष्कर्षापर्यंत पोहोचवण्यासाठी या नवीन तपास पथकाचे नेतृत्व एखाद्या वरिष्ठ व तज्ज्ञ आयपीएस अधिकाऱ्याकडे सोपवण्यात यावे.

21 Jul 2026 12:57 PM (IST)

सोनम वांगचूक आणि अभिजित दिपके यांच्या समर्थनार्थ खोपोली शहरात धरणे आंदोलन

दिल्ली येथील जंतर मंतर येथे सुरु असलेल्या सोनम वांगचूक आणि अभिजित दिपके यांच्या आंदोलनाला पाठींबा देण्यासाठी तसेच लाठीहल्याच्या निषेधार्थ खोपोली येथील डॉ. बाबासाहेब आंबेडकर यांच्या स्मारकाजवळ महाविकास आघाडी आणि नागरिक विद्यार्थी यांनी एकत्र येत ठिय्या आंदोलन करीत पाठिंबा दिला. भर पावसात आंदोलन करीत जोरदार घोषणाबाजी केली.

21 Jul 2026 12:48 PM (IST)

नगर-मनमाड महामार्गावरील कृषी सेवा केंद्राला भीषण आग

जिल्ह्यातील नगर-मनमाड महामार्गावर धामोरी फाटा परिसरातील हरी ओम कृषी सेवा केंद्राला भीषण आग लागली. आग इतकी भीषण होती की काही वेळातच संपूर्ण कृषी सेवा केंद्र आगीच्या विळख्यात सापडले. घटनेची माहिती मिळताच अग्निशमन दल घटनास्थळी दाखल झाले असून आग आटोक्यात आणण्यासाठी शर्थीचे प्रयत्न सुरू आहेत. या आगीत मोठ्या प्रमाणात खत, बियाणे आणि इतर कृषी साहित्य जळून खाक झाल्याची प्राथमिक माहिती आहे. आगीचे नेमके कारण आणि नुकसानाचा आकडा अद्याप स्पष्ट झालेला नाही. या घटनेमुळे परिसरात एकच खळबळ उडाली आहे.

21 Jul 2026 12:36 PM (IST)

अहिल्यानगर जिल्ह्यात 79% खरीप पेरण्या पूर्ण; दुबार पेरणीचे संकट नाही, कृषी विभागाची माहिती

चालू खरीप हंगामात अहिल्यानगर जिल्ह्यामध्ये आतापर्यंत 79% पेरण्या पूर्ण झाल्या आहेत. यामध्ये प्रामुख्याने कापूस, सोयाबीन, तूर आणि मका या पिकांचा समावेश आहे. जिल्ह्यात पावसाचे आगमन उशिरा झाल्यामुळे मुगाच्या पेरणी क्षेत्रात घट नोंदवली गेली आहे. शेतकऱ्यांनी मूग पिकाऐवजी मका आणि सोयाबीनसारख्या पिकांकडे आपला कल वळवला आहे. तसेच जिल्ह्यात उडीद आणि तूर या कडधान्यांची देखील पुरेशा प्रमाणात पेरणी झालेली आहे.

21 Jul 2026 12:24 PM (IST)

अलिबागहून पनवेलला जाणाऱ्या विना थांबा बसचा अपघात

अलिबागहून पनवेलला जाणारी विनाथांबा एसटी बसचा मंगळवारी (दि.21 ) सकाळी अपघात झाला. सुदैवाने एसटीतील 38 प्रवासी सुखरूप असल्याची माहिती उपलब्ध झाली आहे. ही घटना पेझारी येथील चेक पोस्ट जवळ घडली. चालकाचा ताबा सुटल्याने बस रस्त्याच्या एका बाजूला पलटी झाली.त्यामुळे हा अपघात झाल्याची प्राथमिक माहिती पोलिसांनी दिली.

21 Jul 2026 12:13 PM (IST)

वसई-विरार महापालिकेतील कंत्राटी कर्मचाऱ्यांच्या सुरक्षेचा आणि वैद्यकीय सुविधांचा प्रश्न ऐरणीवर

पावसाळ्यात शहरात झालेल्या पूर परिस्थितीत जीव धोक्यात घालून काम करणाऱ्या कर्मचाऱ्यांना मेडिक्लेमसह आवश्यक आरोग्य सुविधा दिल्या जात नाहीत. घाण पाण्यात काम करताना संसर्ग झाल्याने एका कर्मचाऱ्याचा मृत्यू झाला, तर ऑन-ड्यूटी अपघात आणि हृदयविकाराने बाधित कर्मचारी उपचारासाठी कर्जबाजारी झाले आहेत.

पालिका प्रशासन आणि कंत्राटदारांनी मृत व जखमी कर्मचाऱ्यांना न्याय देऊन उपचाराची जबाबदारी स्वीकारावी, अन्यथा आंदोलन मागे घेणार नसल्याचा इशारा श्रमजीवी संघटनेने दिला आहे. या संपूर्ण प्रकरणावर महापालिका प्रशासनाची भूमिका जाणून घेण्यासाठी आमच्या प्रतिनिधींनी संबंधित अधिकाऱ्यांशी संपर्क साधला. अतिरिक्त आयुक्तांनी संबंधित आयुक्तांकडे जाण्याचे सांगितले. मात्र, संबंधित आयुक्तांनी "महानगरपालिका आयुक्तांनी या विषयावर बोलण्यास मनाई केली आहे," असे सांगत कोणतीही अधिकृत प्रतिक्रिया देण्यास नकार दिला. त्यामुळे कंत्राटी कर्मचाऱ्यांच्या गंभीर प्रश्नांवर प्रशासनाची भूमिका अद्यापही स्पष्ट झालेली नाही.

21 Jul 2026 12:05 PM (IST)

बाईक घसरली, चप्पल उडाली; रस्त्याच्या काठावरुन कोसळणार तितक्यात… Video Viral

एका अपघाताचे दृष्य वेगाने शेअर करण्यात आले आहे. व्हिडिओमध्ये रस्त्यावर एक मोठा अपघात झाल्याचे दिसते. रस्ता ओलसर असतो ज्यामुळे बाईक घसरली जाते आणि बाईकस्वार रस्त्यावर कोसळतो. घटनेतील दृष्ये अनेकांना थक्क करणारी आहेत. मुख्य म्हणजे व्यक्ती मृत्यूच्या काठापर्यंत जातो पण म्हणतात काळ आला नसेल तर काही होऊ शकत नाही. व्हिडिओतही असंच काहीसं घडलं.

21 Jul 2026 11:55 AM (IST)

Vivo च्या नव्या स्मार्टफोनने केला धमाका; जाणून घ्या फीचर्स आणि किंमत

टेक कंपनी Vivo ने त्यांच्या X300 सीरीजच्या आणखी एका नवीन स्मार्टफोनची घोषणा केली आहे. कंपनीने त्यांचा नवीन स्मार्टफोन Vivo X300e या नावाने सादर केला आहे. कंपनीने स्मार्टफोनसाठी प्री-ऑर्डर देखील सुरु केली आहे. या स्मार्टफोनची पहिली विक्री 27 जुलैपासून सुरु होणार आहे.

21 Jul 2026 11:45 AM (IST)

भारतीय सैन्यात अधिकारी बनणे होणार सोपे! ‘या’ राष्ट्रीय परीक्षांच्या रँकनुसार थेट ऑफिसर बनण्याची संधी

भारतीय सैन्यात अधिकारी बनण्याचे स्वप्न पाहणाऱ्या तरुणांसाठी एक मोठी खूशखबर आहे. सेना आता भरती प्रक्रिया पूर्वीपेक्षा अधिक सोपी, जलद आणि पारदर्शक बनवण्याच्या तयारीत आहे. नवीन योजनेअंतर्गत जेईई (JEE), क्लॅट पीजी (CLAT PG) आणि नीट पीजी (NEET PG) यांसारख्या राष्ट्रीय पातळीवरील परीक्षांच्या स्कोअरच्या आधारे उमेदवारांना थेट सर्व्हिस सिलेक्शन बोर्ड (SSB) मुलाखतीसाठी बोलावले जाईल. यामुळे स्वतंत्रपणे लेखी परीक्षा घेण्याची गरज कमी होईल आणि पात्र तरुणांना सैन्यात सामील होण्याची उत्तम संधी मिळेल.

21 Jul 2026 11:40 AM (IST)

US-Iran War : अमेरिकन सैनिकांच्या मृत्यूनंतर ट्रम्प आक्रमक; इराणला किंमत मोजावी लागणार

मध्यपूर्वेतील युद्ध आणखी पेटण्याची चिन्हे दिसू लागली आहे. इराणच्या जॉर्डनवरील हल्ल्यात दोन अमेरिकन सैनिकांच्या मृत्यूने मोठी खळबळ उडाली आहे. यामुळे अमेरिका-इराण तणाव वाढू शकतो. याच पार्श्वभूमीवर अमेरिकेचे राष्ट्राध्यक्ष डोनाल्ड ट्रम्प यांनी इराणला आक्रमक इशारा दिला आहे. अमेरिकन सैनिकांना लक्ष्य केल्यास त्याची मोठी किंमत चुकवावी लागेल असे ट्रम्प यांनी म्हटले आहे.

21 Jul 2026 11:25 AM (IST)

Pune Crime: संतापजनक! कॉलेज तरुणीवर चार मित्रांकडून वारंवार लैंगिक अत्याचार; अश्लील व्हिडीओ व्हायरल करण्याची धमकी

पुण्यातील 21 वर्षीय महाविद्यालयीन तरुणीवर चार जणांनी अश्लील व्हिडिओ व्हायरल करण्याची धमकी देत वर्षभर वारंवार लैंगिक अत्याचार केल्याचा आरोप आहे. पीडितेच्या तक्रारीनंतर वाघोली पोलिसांनी फरान शेख, फजल शेख, रेहान शेख आणि साहिल यांना अटक केली असून प्रकरणाचा पुढील तपास सुरू आहे.

21 Jul 2026 11:00 AM (IST)

CJP protest Update: पोलिसांनी विद्यार्थीनीला मारहाण केली छातीवर

 दिल्लीतील जंतरमंतर मैदानावर कॉकरोच जनता पार्टीचे (CJP) आंदोलन पुन्हा एकदा पेटण्याची चिन्हे दिसू लागली आहेत.  सोमवारी पोलिसांनी आंदोलकांना जंतरमंतरवरून हटवले असले, तरी मंगळवारी सकाळपासूनच शेकडो आंदोलक पुन्हा जंतरमंतरवर जमा होण्यास सुरुवात झाली आहे. आंदोलकांनी तिथे पुन्हा स्टेज उभारून आंदोलन सुरू केले आहे. दरम्यान कालच्या संसदेवरील मोर्चादरम्यान पोलिसांकडून विद्यार्थ्यांना झालेल्या मारहाणीवरून अभिजीत दिपके यांनी संताप व्यक्त केला आहे. 

21 Jul 2026 10:50 AM (IST)

महेश ट्युटोरियल्सच्या विद्यार्थ्यांना अरिहंत अकॅडमीचा मोठा दिलासा!

नुकतेच अरिहंत अकॅडमी लिमिटेडने जाहीर केले आहे की, ते महेश ट्युटोरियल्सच्या (एमटी एज्युकेअर लिमिटेड) पात्र विद्यार्थ्यांना अध्‍ययन प्रवासात सातत्य राखण्यासाठी शैक्षणिक पाठबळ देणार आहेत. अरिहंतसाठी विद्यार्थ्यांचे शैक्षणिक हित सर्वोपरी आहे आणि म्हणून त्यांनी कोणतीही अतिरिक्त फी न आकारण्याचा निर्णय घेतला आहे. तसेच त्यांनी असे स्पष्ट केले आहे की विद्यार्थी त्यांच्या कोर्सेससाठी केवळ उर्वरित फी भरतील.

21 Jul 2026 10:40 AM (IST)

CBSE आणि NCERT कडून शिक्षकांना ‘मास्टर ट्रेनिंग’

CBSE Class 9 New Syllabus 2026: राष्ट्रीय शैक्षणिक धोरण (NEP 2020) आणि NCF-SE 2023 अंतर्गत शालेय शिक्षणात सातत्याने बदल केले जात आहेत. याच दिशेने आता इयत्ता ९ वीची गणिताची आणि विज्ञानाची नवीन पुस्तके प्रभावीपणे शिकवण्याची तयारी सुरू झाली आहे. यासाठी ‘केंद्रीय माध्यमिक शिक्षण मंडळाने’ ‘राष्ट्रीय शैक्षणिक संशोधन आणि प्रशिक्षण परिषदेच्या’ सहकार्याने शिक्षकांसाठी एक विशेष ओरिएंटेशन वर्कशॉप आयोजित केले. शिक्षकांना नवीन पुस्तकांची रचना, शिकवण्याच्या पद्धती आणि वर्गात त्यांचा अधिक चांगला वापर कसा करावा, याची माहिती देणे हा या प्रशिक्षणाचा मुख्य उद्देश होता, जेणेकरून विद्यार्थ्यांना नवीन अभ्यासक्रम सहज समजेल.

21 Jul 2026 10:30 AM (IST)

Delhi Capitals च्या Abishek Porel कायद्याच्या कचाट्यात, लवकरच होणार अटक

देशांतर्गत क्रिकेटमध्ये बंगालकडून आणि आयपीएलमध्ये दिल्ली कॅपिटल्सकडून खेळणारा क्रिकेटपटू अभिषेक पोरेल मोठ्या अडचणीत सापडला आहे. एका वैद्यकीय विद्यार्थिनीवर बलात्कार केल्याच्या आरोपाखाली न्यायालयाने त्याच्या अटकेचे आदेश दिले आहेत. हे अटकेचे आदेश कलकत्ता उच्च न्यायालयाने दिले आहेत. तक्रारदार महिलेचे फोटो व्हायरल होऊ नयेत यासाठी पोरेलची सर्व इलेक्ट्रॉनिक उपकरणे जप्त करण्याचे निर्देशही न्यायालयाने मोगरा पोलिसांना दिले आहेत.

21 Jul 2026 10:20 AM (IST)

हॉस्टेलमधून ‘कमळी’ची हकालपट्टी! नयनताराच्या घरात मिळणार का स्थान?

झी मराठीवरील लोकप्रिय मालिका ‘कमळी’मध्ये आता प्रेक्षकांना मोठा भावनिक ट्विस्ट पाहायला मिळणार आहे. कमळीची आई हे जग सोडून गेली असा गैरसमज अनेकांना होता. पण एवढा मोठा अपघात होऊन सुद्धा गौरी सुखरूप वाचली. मात्र, तिच्या डोक्याला दुखापत झाल्याने कमळीच्या आईची स्मृती गेली आहे. कमळीच्या बालपणाबद्दल तिला सगळं माहिती असतं. पण, तिच्या लेकीला ती प्रत्यक्ष ओळखूही शकत नाही. गौरीला खूप मोठा मानसिक धक्का बसला असून आता आईची जबाबदारी कमळीवर असते.

21 Jul 2026 10:14 AM (IST)

पोलिस महासंचालकांचा संशयास्पद मृत्यू

त्रिपुराचे पोलीस महासंचालक (डीजीपी) अनुराग धनखड यांचा संशयास्पद मृत्यू झाला. राज्याच्या पोलीस मुख्यालयातील कार्यालयात संशयास्पद स्थितीत मृतदेह आढळला आहे. धनखड यांचा अशाप्रकारे मृतदेह आढळल्याने एकच खळबळ उडाली आहे. 1994 बॅचचे आयपीएस अधिकारी असलेल्या धनखड यांच्या मृत्यूचे नेमके कारण अद्याप स्पष्ट न झालेले नसून पोलिसांकडून तपास सुरू आहे.

21 Jul 2026 09:00 AM (IST)

विद्यार्थ्यांवर झालेल्या लाठीचार्जनंतर चंद्रशेखर आझाद आंदोलनाला बसले

ज़ुल्म जब भी हद से आगे बढ़ने लगता है,
वहीं से बदलाव का सूरज निकलने लगता है।

आज जंतर-मंतर पर बच्चों और बच्चियों के साथ जिस प्रकार का बर्बरतापूर्ण व्यवहार किया गया, उसने मन को गहराई तक झकझोर दिया। मैंने जलियांवाला बाग का वह दौर नहीं देखा, लेकिन आज जो दृश्य सामने आए, उन्होंने… pic.twitter.com/iaLOkDTv5c

— Chandra Shekhar Aazad (@BhimArmyChief) July 20, 2026