Maharashtra Breaking News Updates Today:
11 Jun 2026 10:20 AM (IST)
पुणे शहरातून एक धक्कादायक घटना समोर आली आहे. बुधवार रात्री १० वाजण्याच्या सुमारास सहकारनगर भागात गोळीबार झाल्याची बातमी समोर आली आहे. या गोळीबारात एक तरुण जखमी झाला आहे. या घटनेमुळे पुणे शहरात भीतीचे वातावरण निर्माण झाले आहे. या घटनेने पुन्हा एकदा सामान्य नागरिकांच्या सुरक्षेचा प्रश्न ऐरणीवर आला आहे.
11 Jun 2026 10:10 AM (IST)
मध्यपूर्वेतल तणाव काही कमी होण्याची नाव घेईना. या तणावाचा फटका आता भारतालाही बसू लागला आहे. ओमानच्या किनाऱ्याजवळ भारतीय क्रू मेंबर्स असलेल्या सेटेबेलो या व्यापारी जहाजावर अमेकरिकेने लष्करी कारवाई केली आहे. यामुळे मोठी खळबळ उडाली आहे. या घटनेत ३ भारतीय नाविक बेपत्ता झाल्याचे वृत्त समोर आले आहे. या पार्श्वभूमीवर भारत सरकारने तातडीने अमेरिकेच्या वरिष्ठ राजनैतिक अधिकाऱ्यांकडे स्पष्टीकरण मागत तीव्र नाराजी व्यक्त केली आहे.
11 Jun 2026 10:03 AM (IST)
सक्करदरा पोलिस ठाण्याच्या हद्दीतील बाजार परिसरात बुधवारी रात्री झालेल्या दुहेरी हत्याकांडाने उपराजधानी हादरली. पैशांच्या व्यवहारातून झालेल्या वादाचे पर्यावसन दोन तरुणांच्या निर्घृण हत्येत झाले. या घटनेत आदित्य ऊर्फ सोनू गजानन भोंडवे (वय २७, सोमवारी क्वार्टर) आणि आदित्य राऊळकर (वय२५, बजरंगनगर) यांचा जागीच मृत्यू झाला.
11 Jun 2026 09:45 AM (IST)
US Iran War Hormuz Closed: पश्चिम आशियातील (Middle East) लष्करी तणाव आता अत्यंत धोकादायक आणि अनियंत्रित वळणावर पोहोचला असून, अमेरिका (America) आणि इराण (Iran) यांच्यात थेट महायुद्ध पेटल्याची चिन्हे दिसत आहेत. अमेरिकेचे अध्यक्ष डोनाल्ड ट्रम्प (Donald Trump) यांनी दिलेल्या इशाऱ्यानंतर आणि आदेशानंतर अमेरिकन सैन्याने इराणच्या हद्दीत घुसून भीषण हवाई आणि क्षेपणास्त्र हल्ले केले. या कारवाईमुळे संतापलेल्या इराणने आता अमेरिकेला अत्यंत शक्तीशाली आणि चोख प्रत्युत्तर दिले आहे.
इराणचा १८ अमेरिकन लष्करी तळांवर एकाच वेळी मोठा हल्लाअमेरिकेच्या हल्ल्याचा बदला घेण्यासाठी इराणच्या अत्यंत प्रभावी आणि आक्रमक मानल्या जाणाऱ्या 'इस्लामिक रिव्हॉल्युशनरी गार्ड्स कोर'ने (IRGC) बहरीन आणि कुवेत या देशांमधील अमेरिकेच्या तब्बल १८ महत्त्वाच्या लष्करी तळांना (Military Bases) लक्ष्य केले आहे.
11 Jun 2026 09:35 AM (IST)
Ratnagiri News: रत्नागिरी येथून एक हृदयद्रावक घटना समोर आली आहे. खेड शहरातील जगबुडी नदीत पोहण्यासाठी गेलेल्या तीन तरुणांचा मृत्यू झाल्याची दुर्दैवी घटना समोर आली आहे. सुट्टीसाठी नातेवाईकांकडे आलेल्या तिघांचा दुर्दैवी मृत्यू झाला. या घटनेने परिसरात शोककळा पसरली आहे. ही घटना बुधवारी उघडकीस आली. या घटनेने परिसरात एकच हळहळ व्यक्त केली जात आहे. उन्हाळ्यात सुट्टीचा आनंद घेण्यासाठी तिघे जण रत्नागिरी येथील खेड येथे आपल्या नातेवाईकांसोबत नदीत पोहण्यासाठी गेले होते. पाण्याच्या खोलीचा अंदाज न आल्याने त्यांचा नदीत बुडून मृत्यू झाला.
11 Jun 2026 09:30 AM (IST)
Dawood Ibrahim: अंडरवर्ल्ड आणि बॉलीवूड यांच्यातील संबंध खूप जुने आहेत. हिंदी चित्रपटसृष्टीतील सर्वात जुन्या कपूर घराण्यातील एका स्टारला अंडरवर्ल्डचा बिनमुकुट राजा दाऊद इब्राहिमच्या घरी चहासाठी आमंत्रित करण्यात आले होते. आजही ही गोष्ट फार कमी लोकांना माहीत आहे आणि ज्यांना माहीत आहे, तेसुद्धा यावर आश्चर्यचकित होतात. खुद्द त्या अभिनेत्याने आपल्या पुस्तकात कबूल केले आहे की, तो त्या प्रसिद्ध गुंडाला एकदा नव्हे, तर दोनदा भेटला होता.
11 Jun 2026 09:25 AM (IST)
नाशिक: नाशिक येथून एक हृदयद्रावक घटना समोर आली आहे. वैशाली नवले… वय अवघं २५. तीन वर्षांपूर्वी मोठ्या थाटामाटात लग्न झालं आणि नव्या आयुष्याची सुंदर स्वप्नं डोळ्यांत साठवून ती सासरी गेली. सुरुवातीला सर्व काही सुरळीत सुरू होतं. मात्र काळ जसजसा पुढे सरकत गेला, तसतसा तिच्या संसारात हुंड्याच्या मागण्यांचा आणि छळाचा काळोख वाढत गेला. अखेर सततच्या मानसिक आणि शारीरिक त्रासाला कंटाळून वैशालीने टोकाचं पाऊल उचलत आत्महत्या केली. घडलेली घटना येवला तालुक्यात वाघाळे येथे घडली. पोलीस ठाण्यात गुन्हा नोंदवण्यात आला आहे.
11 Jun 2026 09:20 AM (IST)
मुंबई : गेल्या काही दिवसांपासून महाराष्ट्राच्या राजकारणात विविध घडामोडी घडत आहेत. त्यातच राष्ट्रवादी काँग्रेस अजित पवार गटाची राज्यसभेची उमेदवारी न मिळाल्याने नाराजीच्या चर्चा असतानाच ज्येष्ठ नेते छगन भुजबळ यांनी पुन्हा एकदा सूचक आणि अर्थपूर्ण वक्तव्ये करत राजकीय चर्चांना उधाण आणले आहे. गेल्या २६ वर्षांत अनेक जण मेहनत आणि कष्टाच्या जोरावर पुढे आले. काही मात्र कष्ट न करताही मोठी पदे मिळवतात, असे वक्तव्य करत त्यांनी पक्षातील घडामोडींवर अप्रत्यक्ष भाष्य केले. मुंबईत माध्यमांशी बोलताना भुजबळ म्हणाले, पक्षासाठी प्रत्येक कार्यकर्ता महत्त्वाचा असतो. मतभेद झाले म्हणून घर सोडत नाही, तर आपली मते मांडतो. त्यांच्या या वक्तव्याचा रोख नेमका कोणाकडे होता, याबाबत राजकीय वर्तुळात तर्कवितर्क लावले जात आहेत. राज्यसभेसाठी भुजबळ हे इच्छुक होते.
पुणे : देशभरातील विविध स्पर्धा परीक्षा, भरती प्रक्रिया आणि प्रवेश परीक्षांमध्ये झालेल्या कथित गैरव्यवहारांविरोधात कॉक्रोच जनता पार्टी आक्रमक झाली आहे. त्यानुसार, आता केंद्रीय शिक्षणमंत्री धर्मेंद्र प्रधान यांच्या राजीनाम्याची मागणी करत देशव्यापी आंदोलन छेडण्याचा इशारा कॉक्रोच जनता पार्टीचे संस्थापक अभिजित दीपके यांनी दिला आहे.
पुण्यातील पत्रकार भवन येथे आयोजित पत्रकार परिषदेत बोलताना दिपके यांनी अनेक मुद्यांवर भाष्य केले. त्यांनी परीक्षा व्यवस्थेतील कथित भ्रष्टाचार, पेपरफुटीमुळे लाखो विद्यार्थ्यांचे आणि स्पर्धा परीक्षार्थीचे भविष्य धोक्यात आल्याचा आरोप केला. यासाठी संबंधित यंत्रणांसह केंद्रीय शिक्षण मंत्रालयालाही जबाबदार धरले पाहिजे, असे ते म्हणाले. दिपके यांनी सांगितले की, ६ जून रोजी नवी दिल्लीतील जंतर-मंतर येथे आंदोलनाचा पहिला टप्पा पार पडला असून, आता ११ जून रोजी सावित्रीबाई फुले पुणे विद्यापीठ येथे शांततापूर्ण आंदोलन करण्यात येणार आहे.
